Verantwoordelikheid of veroordeling
Daar is 'n gesegde wat sê: "Wat die oog nie sien nie, maak die hart nie seer nie."
Hierdie gesegde impliseer dat onkunde op sekere gebiede vir jou 'n voordeel inhou, want dít wat jy nie sien nie, en waarvan jy dus nie weet nie, kan jou nie ontstel nie. Dit is wellis waar so, maar dit is slegs die een kant van die muntstuk. Wanneer ons na die Woord van God kyk, sien ons ook 'n ander persepsie van die gesegde, nl. dat dit wat jy nie weet nie, juis tot jou nadeel kan wees. Onkunde kan jou laat skade ly.
Hosea 4:6a My volk gaan te gronde weens gebrek aan kennis;…
God se volk het in ballingskap gegaan weens 'n gebrek aan kennis. Hierdie ballingskap het beteken dat hulle alles wat vir hulle waardevol was, verloor het, ook hulle grondgebied, en dit alles weens 'n gebrek aan kennis.
Jes 5:13 Daarom gaan my volk in ballingskap weens gebrek aan kennis, …
So sit ons as kinders van God vandag in hierdie gevalle wêreld en ons ly skade weens 'n gebrek aan kennis. Dit geskied te midde van al die teologiese kennis, boeke, prediking, ens. Die enigste manier om die skade wat mense ly te laat sin maak of meer aanvaarbaar maak vir die mens, is om te sê dat dit deel is van God se groot plan vir ons. Hierby voeg hulle dan baie vroom toe dat God se weë nie ons weë is nie en God se planne is nie ons planne nie. God het 'n plan met alles en eendag sal ons verstaan. Hierdie "trooswoorde" ontneem die mens dikwels van sy erfenis. Indien die mens oor die kennis van sy erfenis in Christus beskik het, sou die prentjie heel anders daar uitsien.
Onthou, alle kennis is nie altyd waarheid nie.
Kennis is meestal oorlewerings wat oorgedra word van geslag tot geslag. In die natuurlike realm waarin ons elke dag lewe, word kennis bevestig deur sekere ervarings en ondervindings. Alles in die natuurlike funksioneer volgens vaste wette en riglyne, bv. die wet van swaartekrag, die wet van saai en maai, ens., en ons kan dit nie verander nie.
God is bo-natuurlik en nie onderhewig aan die natuurlike wette nie. Hy is verhewe bo alles. Sy beloftes, Sy liefde, Sy genade, Sy planne is verhewe bo enige natuurwet of -sisteem, ook bokant tyd. Gedagtig hieraan kan ons verstaan as die Woord ons waarsku in Markus 7.
Mark 7:7,13 Maar tevergeefs vereer hulle My deur leringe te leer wat gebooie van mense is.
V13 So maak julle dan die woord van God kragteloos deur julle oorlewering wat julle bewaar het; en dergelike dinge van dieselfde aard doen julle baie.
Dit is juis omdat God verhewe is bo alles, dat niks ons kan skei van Sy liefde nie.
Rom 8:38-39 Want ek is versekerd dat geen dood of lewe of engele of owerhede of magte of teenwoordige of toekomende dinge of hoogte of diepte of enige ander skepsel ons sal kan skei van die liefde van God wat daar in Christus Jesus, onse Here, is nie.
Ons as mens is so deur die natuurlike geprogrammeer dat ons nie altyd verstaan hoe die bo-natuurlike werk nie. Met ons beperkte kennis poog ons dan om die bo-natuurlike God se weë te verstaan en te verklaar, en eintlik maak ons dit net al hoe moeiliker vir onsself om daagliks, in Sy goedheid en guns, in oorwinning te lewe. Jesus het gesê dat die goeie nuus met al die voordele daarvan, vir kindertjies is. Hierin lê juis die geheim, nl. om al Sy goedheid in elke faset van ons lewens te leer ken en te ervaar. Ons moet, soos kindertjies, onvoorwaardelik in Sy Woord glo. Ons moet in geloof stap, al klink dit te goed om waar te wees. Ons sê ons doen dit, maar dit werk nie uit nie. Waarom nie? Waarom lees ons van al die pragtige beloftes in die Woord van God, maar ons ervaar dit nie in ons lewens nie? Wat moet ons eers alles doen voordat God iets vir ons doen of gee? Hierdie is maar 'n paar vrae wat gevra word oor die beloftes in God se Woord. Mense wil dít wat gepreek word, sien en ervaar.
Dit klink wonderlik om te sê ek stap in geloof en dit is waar, maar hoeveel onkunde of valse inligting vorm deel van die geloof waarin ek stap? Onthou, geloof funksioneer op kennis. M.a.w. dit waarmee ek geprogrammeer is, dit wat my verwysingsraamwerk is, bepaal hoe en wat ek glo en hoe ek funksioneer. Dit is hoekom dit belangrik is dat ons altyd oop sal wees om meer te leer.
Joh 16:13 Maar wanneer Hy gekom het, die Gees van die waarheid, sal Hy julle in die hele waarheid lei; …
Die teks sê dat die Heilige Gees ons in die volle waarheid wil lei.
Daar kan baie redes wees waarom ons as kinders van God skade ly, maar ek wil op een spesifieke punt konsentreer. Ek glo dat onkunde een van die belangrikste redes is waarom mense nie in hulle volle erfenis in Christus kan wandel nie. Nou is daar weer verskillende fasette van ons erfenis waarin ons onkundig kan wees bv. voorsiening, beskerming, genesing, ens.
Weer eens wil ek op een spesifieke area van onkunde fokus wat, volgens my opinie, een van die grootste oorsake is dat mense skade ly, nl. die mens se onkunde oor sy geestelike verantwoordelikheid. Ek glo dat mense nog nooit hulle verantwoordelikheid behoorlik verstaan het nie, en dit daarom dan nog nooit kon opneem nie. Kom ons begin by die begin en kyk wat die Woord van God hieroor sê.
GESKAPE MET 'n DOEL
Die mens, ek en jy, is as heersers oor die aarde aangestel. God het die mens geskape om in 'n liefdesverhouding met Hom te staan en ons moet, as Sy verteenwoordigers, Sy koninkryk hier op aarde uitbrei.
Gen 1:26 En God het gesê: Laat Ons mense maak na ons beeld, na ons gelykenis, en laat hulle heers oor die visse van die see en die voëls van die hemel en die vee en oor die hele aarde en oor al die diere wat op die aarde kruip.
God het dus nie die mens geskape vir dieselfde redes as byvoorbeeld die plante en diere nie, nee, God het hulle met 'n doel voor oë geskape. Die mens het 'n taak om namens God uit te voer - die mens moet heers oor God se skepping. Hierdie taak kan die mens alleenlik suksesvol uitvoer indien hy sy verantwoordelikheid aanvaar en nakom.
GESKAPE MET 'n VRYE KEUSE
Gelukkig hoef ons nooit hierdie taak met ons eie vermoëns te doen nie, want God self het, deur Sy Heilige Gees, in ons as mense kom woon. Die groot, belangrike punt wat jy moet onthou is dat God die mens nie as 'n robot geskape het nie. God het die mens 'n vrye keuse gegee. God het gekies om die mens hierdie verantwoordelikheid te gee. Ons besit die volheid van Sy krag en mag, maar het 'n keuse tot watter mate ons toelaat dat Hy deur ons funksioneer. God is almagtig en niks is onmoontlik vir Hom nie, behalwe om Homself met enige iets wat sonde is, te bemoei. Daarom kan God nie lieg nie. Ook kan God nie teen Sy eie Woord gaan nie. Op grond hiervan wil ek dit weer eens beklemtoon dat elke mens 'n vrye keuse het en dat God niemand in enige iets kan indwing of manipuleer nie. Ons moet besef dat ons keuses wel deur baie aardse, menslike en natuurlike omstandighede beïnvloed word.
Van die begin af was die goeie, die mooi en die seën God se bedoeling en wens vir die mens. As gevolg van die mens se verkeerde keuse het die teenoorgestelde plek gekry in hierdie wêreld. Die mens se fout het nie God se droom oor die mens verander nie. Daarom het God van Sy kant af 'n oplossing bewerk wat die probleem kon oplos, sodat die mens weer herstel kon word in 'n liefdesverhouding met Hom en ook as heerser oor die aarde. Die opdrag om as heerser oor die aarde op te tree is dus nog steeds van toepassing. Jesus het die volkome oorwinning oor alles aan die kruis vir ons bewerk. Al gaan ons deur moeilike omstandighede, krisistye, versoekings, ens., is dit steeds moontlik om in oorwinning te leef.
Joh 16:33 Dit het Ek vir julle gesê, dat julle in My vrede kan hê. In die wêreld sal julle verdrukking hê; maar hou goeie moed, Ek het die wêreld oorwin.
Rom 5:17 Want as ten gevolge van die misdaad van die één die dood geheers het deur die één, veel meer sal hulle wat die oorvloed van die genade en van die gawe van die geregtigheid ontvang, in die lewe heers deur die Één, Jesus Christus.
1 Joh 4:4 Julle is uit God, my kinders, en het hulle oorwin, omdat Hy wat in julle is, groter is as hy wat in die wêreld is.
Ons kies hoe ons in die omstandighede fokus op die oorwinning wat daar in Jesus Christus is.
Het die mens 'n aandeel/verantwoordelikheid om die oorwinning wat Jesus vir ons behaal het, te laat uitwerk in ons lewens, of gebeur dit maar soos God goeddink?
Beslis lê die verantwoordelikheid by die mens om, in geloof, die oplossing te aanvaar, daarvolgens te wandel en dit so te laat manifesteer in sy/haar lewe.
Heb 10:12 maar Hy het, nadat Hy een slagoffer vir die sondes gebring het, vir altyd gaan sit aan die regterhand van God.
Hierdie teks vertel vir ons dat Jesus, nadat Hy die vyand oorwin en van alle gesag en mag gestroop het, gaan sit het. Dit is vandag, in die dae waarin ek en jy leef, nog net so van toepassing as 2000 jaar gelede. Jesus sit op hierdie oomblik en wag dat die oorwinning wat Hy reeds bewerk het, hier op aarde moet manifesteer. Wie moet daardie oorwinning laat uitwerk? Ons as mense! Ek en jy - ons is die kanale deur wie God Sy liefde in elke situasie wil laat vloei.
Wat is die harde feite dan van die stelling hierbo? Wanneer ons neerlaag of diefstal, slagting en verwoesting ervaar, is dit nie God se skuld of plan vir ons nie. Dit gebeur omdat ons, om watter rede ookal, nie ons verantwoordelikhede nagekom het nie.
"Dit is nou wat ek noem VEROORDELING."
Dit is outomaties die eerste reaksie wat mense het teenoor die verantwoordelikheidsboodskap.
"So jy wil sê dat, wanneer my kind verdrink of in 'n ongeluk beland, of wanneer daar by my ingebreek word, of wat ookal die skade is wat ek ly, dat dit my eie skuld is!"
Vanaf die tyd wat Adam en Eva in die tuin was, het die mens nog nooit daarvan gehou om die verantwoordelikheid vir hulle lewens/dade te aanvaar nie. Dit is tog so lekker as ons die skuld voor iemand anders se deur kan plaas, veral voor God se deur, want Hy is mos almagtig.
Toe die mens in die tuin verkeerd gekies het, nadat God hulle gewaarsku het, kyk wat het gebeur. Kyk na die liefdevolle Vader wat ons het.
Gen 3:9 Toe roep die Here God na die mens en sê vir hom: Waar is jy?
Het God nie geweet waar hulle was nie? Beslis het Hy geweet, maar ek glo Sy liefde en genade het na hulle geroep met die hoop dat hulle na Hom sou hardloop en erken dat hulle 'n fout gemaak het; dat hulle nie hulle verantwoordelik-heid nagekom het nie. Nee, wat doen hulle toe? Hulle het gewag tot hulle gekonfronteer is en toe het die beskuldigings begin.
Gen 3:12-13 En die mens antwoord: Die vrou wat U gegee het om by my te wees, sy het my van die boom gegee, en ek het geëet.
V13 Daarop sê die Here God aan die vrou: Wat het jy nou gedoen? En die vrou antwoord: Die slang het my bedrieg, en ek het geëet.
Indirek gee Adam vir God die skuld: "Die vrou wat U vir my gegee het …"
Ons as mense doen vandag nog presies dieselfde. Aangesien ons uit onkunde of ongeloof of wat ookal, nie ons verantwoordelik-hede as heersers uitvoer nie en dan skade ly, is dit die maklikste om God die skuld te gee.
Die mens is behep met skuld. Wie se skuld was dit nou eintlik dat ek skade gely het? Hierdie beheptheid het 'n kritiese gesindheid tot gevolg, want nou moet ons die fout iewers buite onsself gaan soek. Dan word die goeie nuus van die kruis afgebreek as voorspoedsteologie en as veroordelend gesien, net om myself te regverdig. Dit is makliker om die teologie as veroordelend af te maak, as om die verant-woordelikheid te aanvaar! Dit is amper asof mense dink dat God hulle sal verwerp as hulle 'n enkele keer faal in hulle verantwoordelikheid. Niks is verder van die waarheid nie, want Jesus het gesê dat hy juis gekom het vir hulle wat faal.
Markus 2:17 En toe Jesus dit hoor, sê Hy vir hulle: Die wat gesond is, het die geneesheer nie nodig nie, maar die wat ongesteld is. Ek het nie gekom om regverdiges te roep nie, maar sondaars tot bekering.
Johannes 12:47 En as iemand na my woorde luister en nie glo nie, Ek oordeel hom nie; want Ek het nie gekom om die wêreld te oordeel nie, maar om die wêreld te red.
Jesus wil hê dat ons verantwoordelikheid moet aanvaar vir ons besluite en keuses, selfs al beteken dit dat ons soms mag faal, want die Geneesheer is altyd daar om weer te genees.
WAT WORD BEDOEL MET VERANTWOORDELIKHEID?
Om dit so eenvoudig moontlik te stel, is om te sê dat dit iets is of beginsels is wat ek moet doen, volg of nakom, deur 'n wilskeuse van my kant af, om 'n sekere resultaat tot gevolg te hê.
'n Eenvoudige voorbeeld: Wanneer ek in 'n motor sit en die ruit is oop en dit begin reën, is dit my verantwoordelikheid om die ruit op te draai as ek nie wil natreën nie. Ek kan enige iets anders doen wat mooi is of klink, selfs bid, maar niks sal my situasie verander nie. Ek moet tot aksie oorgaan deur 'n wilsbesluit te neem en die tegnologie, wat reeds in plek is ('n venster wat kan toedraai), gebruik om die nodige resultaat te verkry. Sou ek nie die ruit toedraai nie en ek reën sopnat, wie se skuld is dit dan? Dalk werk die motor se ruite elektronies en ek is onkundig oor die gebruik daarvan. Wie se skuld is dit? Ek moet mos die handleiding van die motor lees - dit is my verantwoordelikheid. Ek kan mos nie my onkunde of verkeerde keuse nou voor die deur van die motorvervaardigers lê en hulle die skuld gee en sê dat dit 'n slegte motor is nie.
Wanneer ek skade ly as gevolg van die feit dat ek nie my verantwoordelikheid nakom nie, gebeur daar nou iets interessants. Ek moet nou my reaksie in hierdie spesifieke situasie kies.
Ek kan dit as 'n positiewe geleentheid sien om te leer, m.a.w. ek neem die motor se handleiding en lees hoe die elektroniese vensters werk, sodat ek in die toekoms anders kan optree.
OF
Ek kan die situasie as baie negatief ervaar en wanneer ek my lot bekla teenoor 'n persoon wat die handleiding gelees het en dus die motor ken, ervaar ek sy/haar inligting as veroordelend. Ek hoor dan dat dit eintlik my eie skuld is dat ek natgereën het, omdat ek nie die ruit toegedraai het nie, of nie geweet het hoe om dit toe te kry nie.
"So, nou sê jy dit is my skuld?" Ja, want alles wat ek nodig gehad het in daardie situasie om die oplossing te ervaar, was tot my beskikking.
NB! Onthou, elke persoon kies sy/haar reaksie in elke situasie.
Die mate van kennis waartoe ons beskik van die oplossing, antwoord of uitkoms van die situasie, beïnvloed en bepaal ons keuses. Elke persoon kies waarop hy/sy in elke situasie fokus. Dit is die mens se eie verantwoordelikheid.
L.W. Dít waarop jy fokus, dít oorweldig jou!
Die verkleurmannetjie op hierdie boekie se voorblad beskik oor die vermoë om sy kleur te verander. Hierdie vermoë het God aan hom gegee. God het ook aan hom die vermoë gegee om vanself, sonder dat hy hoef te dink of besluit, van kleur te verander om by die omstandighede aan te pas. Die verkleurmannetjie het dus geen verantwoordelikheid nie. God het die mens juis anders geskape. Ons het ook van God die vermoë "om van kleur te verander" gekry om by omstandighede aan te pas, maar ons het die verantwoordelikheid om self die feite te inter-preteer om oor die "kleur" te besluit. Ons beskik ook oor die feite - God het dit in 'n omvattende Handleiding aan ons beskikbaar gestel. Ons moet ons net vertroud maak met die inhoud van die Handleiding - dit is 'n verantwoordelikheid op sy eie. Die vermoë om die feite te interpreteer het ons ook van God gekry, nl. die Heilige Gees wat ons in die volle waarheid wil lei. So, al wat ons moet doen is om ons verantwoordelikheid na te kom.
Wat is die hoofrede waarom mense vandag nie graag hulle verantwoordelikhede wil opneem nie?
Ek glo dat daar baie redes gegee kan word, maar ek wil slegs dié uitlig wat, volgens my persepsie, die belangrikste is:
Die belangrikste rede is sekerlik dat die mens nie besef wat die volle impak en bedoeling van God was, en steeds is, toe Hy gesê het dat Hy die heerskappy (alle gesag en mag) oor die aarde aan die mens gee nie. Hy het Sy gesag en mag tot ons beskikking gestel, en eintlik Homself tot 'n mate aan ons keuses onderwerp. Dit klink baie rof om dit te sê, maar dink 'n bietjie mooi daaroor na. Reeds in die tuin van Eden gee God aan Adam die vrye keuse om die diere hulle name te gee. God vra nie Adam se voorstelle en veto dit dan nie, nee, Hy gee die volle verant-woordelikheid aan Adam.
Gen. 2:19 ...En die HERE God het uit die aarde geformeer al die diere van die veld en al die voëls van die hemel en hulle na die mens gebring om te sien hoe hy hulle sou noem. En net soos die mens al die lewende wesens genoem het, so moes hulle naam wees.
LW: Ons opdrag is vandag steeds dieselfde. Hy is steeds ons vermoë, deur die Heilige Gees wat in ons woon, en steeds is dit ons verant-woordelikheid om dit, deur geloof, in en deur ons lewens te laat manifesteer.
Volgens Johannes het Jesus gesê dat ons selfs groter werke sal doen as wat Hy, Jesus, gedoen het.
Joh 14:12 Voorwaar, voorwaar Ek sê vir julle, wie in My glo - die werke wat Ek doen, sal hy ook doen; en hy sal groter werke doen as dit, omdat Ek na my Vader gaan.
Wanneer ons hierdie woorde probeer verstaan, begin ons iets verstaan van die omvang van die verantwoordelikheid wat op ons skouers rus. Indien hierdie verantwoordelikheid jou keel laat toetrek, gee Jesus in die volgende vers al die vertroosting wat ons nodig het:
Joh 14:13 En wat julle ook al in my Naam mag vra, dit sal Ek doen, sodat die Vader in die Seun verheerlik kan word.
Dit is wel so dat ons 'n groot verantwoordelikheid het, maar saam met die verantwoordelikheid kom die vermoë van Hom wat in ons woon.
'n Ander rede waarom ons nie ons volle verantwoordelikheid nakom nie, is omdat ons vasgevang sit in verkeerde oorlewerings en leringe rondom dié aspek. Ons is geleer dat alles wat ons ervaar en om ons sien en beleef, elke sekonde van ons lewens, deur God, voor die grondlegging van die wêreld, bepaal is. Dit klink wonderlik, maar as daar net 'n bietjie verder gedink word, sal jy sien hoe dit juis die vyand is wat hierdie gedagte gevestig het, want hy wil daardeur God se karakter verdraai. Vra vir jouself 'n paar teenvrae oor hierdie stelling, bv.:
Indien God dan onvoorwaardelik volmaakte liefde is, hoe kan Hy sonde of steel, slag en verwoes beplan? (Kyk na al Sy wonderlike beloftes vir ons.)
Lig en duisternis het niks met mekaar te doen nie. Wat is dit wat ons om ons sien in die wêreld? Lig of duisternis?
Is dit God se plan dat hierdie wêreld in sulke chaos moet wees? Beslis nie!
Nou waarom lyk dit dan so om ons? Die rede hiervoor is dat die kinders van God nie hulle verantwoordelikhede opneem en Sy oorwinning laat uitwerk nie. Beslis het God reeds van voor die grondlegging van die aarde af, 'n volmaakte plan vir elke persoon se lewe.
Ps 139:13-16 Want U het my niere gevorm, my in my moeder se skoot geweef.
V14 Ek loof U, omdat ek so vreeslik wonderbaar is; wonderbaar is u werke! En my siel weet dit alte goed.
V15 My gebeente was vir U nie verborge toe ek in die geheim gemaak is nie, kunstig geweef in die dieptes van die aarde.
V16 Oë het my ongevormde klomp gesien; en in u boek is hulle almal opgeskrywe: dae dat alles bepaal was, toe nog geeneen van hulle daar was nie.
God se plan vir elke persoon word in same-werking met die mens se keuses uitgewerk. Solank ek onder leiding van die Heilige Gees, in gehoorsaamheid aan Sy stem, wandel en optree, ontvou hierdie plan dag vir dag in my lewe. Net so is dit mos logies dat ek nie in God se plan vir my lewe wandel as ek deur ongehoor-saamheid aan Sy stem, my eie kop volg en doen wat ek wil nie. God se plan kan mos nie in 'n lewe uitwerk as die persoon nog vir God verwerp nie. Daarom glo ek dat daar mense sterf wat nie een tree binne God se plan vir hulle lewens gegee het nie. Sy plan ontvou in 'n verhouding met Hom waarin die Heilige Gees ons elke oomblik in waarheid (sy plan vir ons) wil lei.
WAT IS GOD SE TOELATENDE WIL/PLAN DAN VIR DIE MENS?
God het die mens as heerser met 'n vrye keuse geskape om oor die aarde, omstandighede, ens. te heers. Om die mens in staat te stel en hom die vermoë te gee om hierdie opdrag te kan uitvoer, het God Homself deur die Heilige Gees ín die mens laat woon, sonder om die mens se keuse en verantwoordelikheid weg te neem.
God laat die mens toe om sy vrye keuse uit te voer. Die mens kies wie hy/sy gaan gehoor-saam. Die mens kies waarop hy/sy gaan fokus. Indirek sê ons die volgende: Aangesien God ons nie manipuleer of dwing nie, moet Hy toelaat wat die mens toelaat. Die vyand of gevalle wêreld kan net in ons lewens dít regkry wat ons toelaat. Om alles maar net weer aan God se toelatende wil toe te skryf, kan weer maklik 'n vermyding van ons verantwoordelikhede word.
'n Ander rede is dat ons as mense vasgevang is in vrees vir mense-opinies. “Wat gaan die wêreld of my vriende of my familie van my sê?” Die dag wanneer ons besluit om voluit in ons erfenis te wandel, word ons ‘n "paw-paw" in hulle oë, want om voluit in geloof te stap beteken om téén die aanvaarbare, die natuurlike, die normale te stap. God se Woord is lynreg teenoor die beginsels van die wêreld waarin ons leef, bv.: Ons word groot in 'n wêreld waarin ek myself moet verdedig. Wanneer iemand my slegsê, sê ek hom terug sleg. Die wêreld sê: 'n oog vir 'n oog en 'n tand vir 'n tand. Die Woord van God sê die geheim lê juis daarin om die teenoorgestelde gesindheid te openbaar en daarvolgens op te tree of te reageer.
Matt 5:38,39,44 Julle het gehoor dat daar gesê is: Oog vir oog en tand vir tand.
V39 Maar Ek sê vir julle dat julle 'n slegte mens nie moet verstaan nie; maar as iemand jou op jou regterwang slaan, draai ook die ander een na hom toe.
V44 Maar Ek sê vir julle: Julle moet jul vyande liefhê; seën die wat vir julle vervloek, doen goed aan die wat vir julle haat, en bid vir die wat julle beledig en julle vervolg; …
Jy sien, om my verantwoordelikheid volgens die Skrif op te neem, vereis 'n aksie van my kant af. Ek moet dus keuses uitoefen om my wandel in lyn met die Skrif te kry. Die oomblik wanneer ek 'n aksie uitvoer, moet daar 'n resultaat wees, en wanneer ons nie dadelik die gewenste resultaat kry nie, pak 'n vrees vir mense-opinies ons beet.
Mark 16:15-18 En Hy het vir hulle gesê: Gaan die hele wêreld in en verkondig die evangelie aan die ganse mensdom.
V16 Hy wat glo en hom laat doop, sal gered word; maar hy wat nie glo nie, sal veroordeel word.
V17 En vir die wat geglo het, sal hierdie tekens volg: in my Naam sal hulle duiwels uitdryf, met nuwe tale sal hulle spreek,
V18 slange sal hulle opneem; en as hulle iets dodeliks drink, sal dit hulle geen kwaad doen nie; op siekes sal hulle die hande lê, en hulle sal gesond word.
Hier sien ons weereens die mag en gesag wat ons as heersers van die aarde het, met Hom wat in ons woon. Ons moet nou in geloof die hande op siekes kan lê sodat hulle gesond kan word. Dit is Sy opdrag en wil.
Wat gebeur egter elke dag rondom ons? Ons stap nie in geloof in hierdie opdrag nie, want die resultate is die meeste van die tyd nie wat ons verlang nie. "Wat sal die mense sê as ek glo en daarvolgens handel en verklaar dat God niks met siektes te doen het nie? Wat gaan hulle sê as ek hier vir iemand bid en niks gebeur nie?" Die liggaam van Christus is al so verward oor wat God se volmaakte wil en plan vir ons is, asook wat ons volkome erfenis in Jesus Christus is, dat ons nie ons verantwoordelikhede wil opneem nie. Wanneer ons dus in die volkome offer en volmaakte oorwinning van Jesus Christus glo sonder 'n "ja maar" en verskonende verduidelikings, sien broers en susters in die liggaam van Christus ons meestal as veroordelend.
Beteken hierdie lering of interpretasie dat ek alles moet doen, en dat ek alle verantwoordelikheid het en dat God niks doen nie? Allermins!
Eerstens is dit God wat aan my die vermoë en hulpbronne gee en ek is slegs 'n dienswillige instrument. Die volgende Engelse uitdrukking illustreer dit vir my baie mooi: "You can pray to God for wind, but you must hoist your own sails." God laat die wind waai, Hy verskaf dus die hulpbronne. God gee ook aan my die krag van gebed om die hulpbronne te aktiveer, maar God laat die ophys van die seile aan my oor - dit is my taak en verantwoordelikheid. Wat sal gebeur indien ek dit nie doen nie? Niks! Ek is die een wat sal skade ly, want die wind sal waai, maar my bootjie sal nooit die hawe verlaat nie. Weer eens is dit ook weer God wat aan my die vermoë gee om my verantwoordelikheid na te kom; ek moet net gewillig wees.
VOORWAARDELIKE SEëN
God se liefde vir ons is onvoorwaardelik - Hy het ons eerste liefgehad toe ons nog sondaars was. God se seën is egter voorwaardelik, in dié sin dat ons ons verantwoordelikhede moet nakom deur in die koninkryk van God se beginsels te wandel. Dit is nie reëls en wette nie. Sy koninkryksbeginsels is anders as ons wêreldse beginsels, en dit ontsluit ons erfenis in ons lewens.
LW. Ons hoef nie iets te doen om God se seën te ontvang nie, ons moet net ons verantwoordelikhede nakom om dit te ervaar. God het reeds die deposito gemaak. Deur Jesus se kruisverdienste is dit reeds in my en jou rekening inbetaal; ons besit dit dus reeds.
Efs 1:3 Geseënd is die God en Vader van onse Here Jesus Christus wat ons geseën het met alle geestelike seëninge in die hemele in Christus,
2 Pet 1:3 Immers, sy goddelike krag het ons alles geskenk wat tot die lewe en godsvrug dien, deur die kennis van Hom wat ons geroep het deur sy heerlikheid en deug,
Die probleem is egter dat ons nog nie uit ons rekening onttrek nie en dus nie die voordele ervaar nie, omdat ons nie ons verantwoordelikhede nakom nie.
Kom ons kyk net eers na God se onvoorwaardelike liefde:
1 Joh. 4:10 Hierin is die liefde: nie dat ons God liefgehad het nie, maar dat Hy ons liefgehad het en sy Seun gestuur het as 'n versoening vir ons sondes.
Rom. 5:8 maar God bewys sy liefde tot ons daarin dat Christus vir ons gesterf het toe ons nog sondaars was.
Kom ons kyk nou na God se voorwaardelike seën:
Lukas 11:10 Want elkeen wat bid, ontvang; en hy wat soek, vind; en vir hom wat klop, sal oopgemaak word.
Ps 34:8 welgeluksalig is die man wat by Hom skuil!
Psalms 106:3 Welgeluksalig is hulle wat die reg bewaar, die wat altyd geregtigheid doen.
Jak 4:8 Nader tot God, en Hy sal tot julle nader. Reinig die hande, julle sondaars, en suiwer die harte, julle dubbelhartiges!
Matt 5:9 Salig is die vredemakers, want hulle sal kinders van God genoem word.
Deut 28:2 En al hierdie seëninge sal oor jou kom en jou inhaal as jy luister na die stem van die HERE jou God.
Gaan lees gerus hoe die omvang van God se seën in die volgende verse van Deut. 28 beskryf word. Dit is werklik "mind boggling." Dit is te goed om waar te wees. Tog is dit! L.W. Die vloek wat ook in Deut 28 bespreek word, is reeds deur Jesus aan die kruis gedra.
Gal 3:13 Christus het ons losgekoop van die vloek van die wet deur vir ons 'n vloek te word - want daar is geskrywe: Vervloek is elkeen wat aan 'n hout hang
Jy kan die vloek egter wel ervaar as jy dit glo en dit in jou lewe akkommodeer, maar dit is nie God se hart vir jou nie.
Lukas 6:38 Gee, en aan julle sal gegee word. 'n Goeie maat wat ingedruk en geskud en oorlopend is, sal hulle in jul skoot gee, want met dieselfde maat waarmee julle meet, sal weer vir julle gemeet word.
Indien jy God se seën in jou lewe wil ervaar, moet jy jou verantwoordelikheid nakom. God se seën werk volgens vaste beginsels, en indien jy daaraan gehoorsaam is, sal jy verstom staan oor die omvang van Sy seën. Lees weer wat Lukas sê: Dit is 'n goeie maat, dit is ingedruk, dit is geskud, maar steeds loop dit oor - God se seën is oorvloedig. Lees ook verder: Die mate waarin jy dit sal ervaar, hang af van die maat waarmee jy meet. Dit is nie 'n veroordeling nie, dit is 'n verantwoordelikheid.
AANHOUER WEN
Ek wil jou uitdaag om, al werk alles nog nie volkome uit in jou wandel nie, voluit te stap in jou erfenis in Christus en vas te staan op God se beloftes in Sy Woord TOTDAT die oorwinning begin deurbreek.
Die kerk van Christus wag dat God alles in elke situasie moet kom doen. Die Woord wys duidelik dat Hy het reeds 2000 jaar terug alles volbring het, die volle prys betaal en aan die regerhand van die Vader gaan sit het. Hy het die Heilige Gees gestuur om ons in die volle waarheid van daardie wonderlike oorwinning te lei, want ons het die verantwoordelikheid om nou daardie oorwinning in ons lewens en op aarde te laat manifesteer.
Dit praat van 'n wandel in GELOOF. Lees die Woord met 'n verantwoordelikheidsbril, dan sal jy verbaas staan om te sien hoe die opdrag aan ons gegee is, bv.
Efs 4:22-24 … dat julle, wat die vorige lewenswandel betref, die oue mens moet aflê wat deur die begeerlikhede van die verleiding te gronde gaan,
V23 en dat julle vernuwe moet word in die gees van julle gemoed
V24 en julle met die nuwe mens moet beklee wat na God geskape is in ware geregtigheid en heiligheid.
As Jakobus dus sê dat die geloof sonder die werke dood is, dan sê hy dat, indien ons nie ons verantwoordelikhede aanvaar nie, ons geloof ook kragteloos is, want geloof is 'n aksie wat uitgevoer word.
Jak 2:26 Want soos die liggaam sonder gees dood is, so is ook die geloof sonder die werke dood.
Die werke spruit voort uit die geloof en ons verantwoordelikheid spruit dus ook voort uit ons geloof. Omdat ons glo, aanvaar ons ons verant-woordelikheid en nie andersom nie. Ons kom nie ons verantwoordelikheid na sodat ons God kan behaag nie, maar juis omdat ons reeds ontvang het. Ons het reeds al die seëninge ontvang, selfs al ervaar ons dit nog nie, en daarom skryf Paulus aan die mense in Filippense dat hulle reeds, wanneer hulle vra, moet dankie sê. Dit beteken om, wanneer ons bid, reeds in geloof die oplossing te aanvaar.
Filip 4:6 Wees oor niks besorg nie, maar laat julle begeertes in alles deur gebed en smeking met danksegging bekend word by God.
Kyk weer na die aanhaling uit Efesiërs en ook die res van die Nuwe Testament. Hoeveel keer kom woorde voor soos: Lê af; neem op; beklee jou; wandel so; werp af; moenie dit of dat doen nie; en laat ons dit of dat doen. Dit alles staan in die bevelsvorm, m.a.w. ek en jy het die verant-woordelikheid om hierdie ding te doén en te kiés om daarvolgens te wandel.
Moenie dat die vyand jou mislei oor wat God bedoel het toe Hy ons as verteenwoordigers namens Hom oor die aarde aangestel het nie. Die vyand beroof ons van ons erfenis en kry daardeur die geleentheid om in ons lewens te steel, slag en verwoes, asook om die liefdevolle God se karakter in die mense se oë te verdraai.
Indien ek nie my verantwoordelikheid opneem nie, kan ek baie maklik skuldig voel en dan sal ek die boodskap as veroordelend ervaar. Die keuse lê by my en jou.
KIES JOU REAKSIE
Ek en jy is soos die verkleurmannetjie - ons kies ons reaksie:
die boodskap is nie vir my nie, dit is veroordelend.
OF
ek aanvaar my verantwoordelikheid met die wete dat die Vermoë in my woon. Ek sal en wil elke dag God se volle seën in my lewe ervaar. Ek wil die erflating van die kruis opeis.
God het dit baie eenvoudig aan die Israeliete gestel:
Deut. 30:19 Ek neem vandag die hemel en die aarde as getuies teen julle; die lewe en die dood, die seën en die vloek het ek jou voorgehou. Kies... jy...
Ons lewenswandel is 'n ingesteldheid en ons kies hoe dit sal wees. 'n Negatiewe uitkyk op die lewe wat heeltyd fout vind met alles, OF 'n positiewe uitkyk wat die potensiaal in alles sien en wat oop is vir veranderings en bereid is om te leer. Kies jy vandag om die mooi, die goeie, die seën in ander mense, die wêreld om jou en ook in God raak te sien?
Dít waarop jy gaan fokus, dít gaan jou oorweldig.
No comments:
Post a Comment